" المدلعه" الحلوي الدمياطي الخطيرة

 

" المدلعه" الحلوي الدمياطي الخطيرة

 "المدلعة"، طبقة كنافه مقرمشه وطبقه بسبوسه طريه ودايبه دوب، وبينهم طبقة كريمة ومتغطية بالكريمة وصوص الكراميل والشيكولاته بجد روعة

أولاً: تحضير طبقة الكنافة

نص كيلو كنافه مفرزة ومفرومة

نص كوب سمن سايحه 

شربات الكنافة

 كوب ونص سكر

كوب ونص ماء
عصير نص ليمونة

كيس فانليا
 - طلعى الكنافه من الفريزر وفركيها كويس حتى تصبح ناعمة واتركيها شوية تأخذ حرارة الغرفة
- ثم ضيفى عليها نص كوب السمنه السايحه وافركيها كويسه بحيث تتشرب السمنه كلها
- افرديها فى صنيه وسط واتضغطي عليها كويس وتكون متساوية، وحاولى تكون الطبقة رفيعة.
- ودخليها الفرن تاخد تقريبا ربع ساعة على درجة حرارة 180، وأول ما تحمر من تحت تفتحي الشوايه عشان تاخد لون ذهبي جميل من قوق.
- طلعيها واسقيها وهى سخنة بالشربات الدافىء وسيبها تبرد

ثانياً: تخضير طبقة البسبوسه

نص كيلو سميد (دقيق بسبوسة)
نص كوب سكر
كوب إلا ربع لبن
كوب إلا ربع سمن سايحة
معلقتين جوز هند
معلقه عسل نحل كبيره (او عسل جلكوز)

شربات البسبوسة

كوب سكر
كوب ونص ماء
عصير نص ليمونة
كيس فانليا

- ضعى السمنة السايحة على سميد البسبوسة وجوز الهند وقلبى كويس حتى تتشرب كل الحبيبات وتصبح مرملة
- ضعى السكر واللبن علي النار ومعها ملعقة عسل ابيض ( أو سيرب تقيل) وقلبى حتى يذوب السكر ويصبح الخليط دافى
- انزلى بيهم علي البسبوسه، واقلبى بأطراف الصوابع براحة
- أفرشى صنيه نفس مقاس بتاعه الكنافه بورق الزبده، وادهنى سمنه وضعى خليط البسبوسه
- دخلى صنية البسبوسة الفرن على درجة حراره متوسطه، واول ما تاخد لو ن ذهبي أطفي وافتحى الشوايه عشان الوجه يحمر
- طلعى البسبوسة واسقيها بشربات سخن خفيف نوعاً، سيبها تبرد شويه

ثالثاً: تحضير الكريمة

نص كوب شانتيه خام
ربع كوب باتسيري بودر أوعلبه قشطه
نص كوب ماء مثلج أو لبن
نص كوب سكر

- فى بولة ضعى كل المكونات واضربى كويس بالمضرب الكهربى حتى تحصلى على قوام الكريمة المناسب

رابعاً: تحضير صوص الكراميل أو التوفى

كوب سكر
كوب لبن ساخن
معلقة ونص كبيرة زبدةمعلقة

 كبيرة نشا مذابة فى معلقتين لبن
- فى حلة على نارمتوسطة ضعى كوب السكر بدون تقليب إلى أن يبدأ يتكرمل وهنا قللى درجة الحرارة
- ثم ابدأى قلبى السكر حتى يذوب كله ويكرميل نماماً
- ضعى الزبدة وقلبى حتى تذوب، ثم ضعى كوب اللبن الساخن وقلبى حتى يذوب الخليط تماما
- ضعى معلقتبن اللبن المذاب بها النشا وقلبى حتى يصبح القوام تقيل حبة
- صبي صوص الكراميل فى طبق وغطيه واتركيه برد

خامساً: تحضير المدلعــــة

- فى صنية التقديم ضعى أول طبقه وهى الكنافه، ثم أفردى عليها الكريمة باستخدام كيس الحلوانى، وساوى بالسكينة
- ثم خدى طبقه البسبوسه اقلبيها علي الكنافه وشيلى ورق الزبده بحيث يكون وجه البسبوسة مقابل الكنافه
- غطي وجه البسبوسة بالكريمه أيضاً وساوى بالسكينة، ثم وزعى صوص الكرميل وافرديه كويس
- اعملى بكيس الحلوانى خطوط من صوص الشيكولاتة، والكريمة بالتبادل
- بطرف السكينة أو خلة أسنان روحى وتعالى على خطوط صوص الشيكولاتة والكريمة بالتبادل، حتى تحصلى على شكل المدلعة المعروف
- دخلى صنية المدلعة الثلاجة تجمد حبة، وقدميها


وبألف هنـــا وشفــــا

وسفرة دايمة